کوردستان

وەزارەتا دارایی بڕیارەكا نوو دەرخست

کوردستان دهوك دیجیتال میدیا

وەزارەتا دارایی و ئابووری یا حكوومه‌تا هه‌رێما كوردستانێ، كاركرن ب پوولا دارایی ل چەند مامەلەیێن فەرمانگەهێن حكوومی راگرتن و بەرپرسەكێ وەزارەتێ ژی زانیارییان د ڤی واری دا ئاشكرا دكەت.

ل دووڤ نڤیسارەکا وەزارەتا دارایی كەفتیە، ئاماژە ب وێ كریە، كۆ كاركرن ب پوولا دارایی دێ هێتە راگرتن و ل جهێ پوولی، دێ پسوولا ژمێركاری هێتە بکار ئینان.

د نڤیسارێدا هاتیە: "مە بڕیار دا کۆ كاركرن ب هەمی (فیئەیێن) پوولا دارایی بهێتە راگرتن، ل جهێ وی پێتڤیە پسوولا ژمێركارییا 37/ ئەلف بهێتە بكار ئینان، بۆ وەرگرتنا داهاتان و داهات ژی بكەنە داهاتێ دوماهیکێ بۆ گەنجینا حكوومەتا هەرێما كوردستانێ."

بەرێ ڤێ بڕیارێ، بۆ مامەلەیێن هەڤژینیێ، یان بناڤکرن و تاپۆیا خانیان، یان مامەڵەیێن دابەشناما شەرعی و بەلگەنامەیێن وەغەرا دوماهیکێ و گرێبەست كرن و هندەك مامەلەیێن دی ل فەرمانگەهێن حكوومی، پێتڤی بوو پوولا دارایی هەبا، كۆ کوژمەکێ پارەی دهاتە وەرگرتن.

ئارام عەبدوڵلا، رێڤەبەرێ گشتیێ بودجەی ل وەزارەتا دارایی راگەهاند: "ئەگەرێ كاركرن ب پوولا دارایی بۆ وێ ڤەدگەڕیت، کۆ دسالا 2017دا حكوومەتێ پوول چاپ نەكرینە، پوول كێم بوونە و پوولێن سەختە و قاچاغ ژی زۆر بووینە، هەروەسا تێچوویا وێ ژی زۆر بوویە، ژبەرکۆ ل جهێ پوولی، كار ب پسوولا ژمێركارییا 37/ ئەلف دهێتە کرن و نوکە ل عێراقێ ژی كار ب پوولا دارایی ناهێتە کرن."

ئاماژە ب وێ ژی کر: "ئەو مامەلەیێن بەرێ، پوول بۆ وان یا پێتڤی بوو، ل جهێ وی پسوولا وی پارەی دهێتە وەرگرتن و دێ رۆتینیاتا ژی کێم كەت."

ئارام عەبدوڵلا ئاشكرا ژی كر: "پوولێ مەزاختیەکێ زۆر دڤێت، ژبەرکۆ ل دەرڤە دهاتە چاپ کرن، بۆ نموونە تێچوونا پوولەكێ 500 دینار بوون لسەر حكوومەتێ، بەلێ ئێك دەفتەرێن پسوولەیا ژمێركاری، كۆ 50 لاپەڕەنە، تنێ سێ هزار لسەر حكوومەتێ بوون، ژبەرکۆ مە تێچوو كێمكر و رۆتین ژی د مامەڵەیاندا نەهێلان."

وی بەرپرسێ دارایی ئەو ژی دیار کر: "ل هەر فەرمانگەهەكێ وڵاتیان پێتڤی ب پوولێ هەبیت، نوکە پسوولەك دێ بۆ وان هێتە کرن و هیچ رسوماتەكا زێدەتر ژێ ناهێتە وەرگرتن."