کوردستان
وەزیرێ شارەوانیێ: پێدڤیە بەری 10ێ ئوکتۆبەرێ، ئامادەکاریێن دابەشکرنا ئەردی تەمام ببن
2026-01-11 , 18:41
کوردستان دهوك دیجیتال میدیا
ب سەرپەرشتیا وەزیرێ شارەوانی و گەشتوگوزاریێ حکومەتا هەرێما کوردستانێ، جڤینەک دەربارەی لەزکرنا پرۆسەیا دابەشکرنا ئەردی هاتە ئەنجامدان.
دووشەمب، 26-08-2024، ب سەرپەرشتیا ساسان عەونی، وەزیرێ شارەوانی و گەشتوگوزار و ب ئامادەبوونا شیرەتکار و رێڤەبەرێن گشتی ل وەزارەتا شارەوانی و گەشتوگوزار و هەمی رێڤەبەرێن گشتی یێن شارەوانیان و سەرۆک شارەوانیان و رێڤەبەرێن نەخشەدانانا ئاڤاکرنێ ل پارێزگەه و ئیدارێن سەربەخۆ جڤینەکا تایبەت ب لەزکرنا ئامادەکاریێن دابەشکرنا ئەردی هاتە ئەنجامدان.
د جڤینێ دا، وەک د راگەهاندنەکا وەزارەتا شارەوانیێ دا هاتی، هەڵسەنگاندنەکا تەمام بۆ کار و بارێن پرۆسەیا دابەشکرنا ئەردی ل سەر فەرمانبەران هاتە کرن و تێدا ژ لایێ هەمی شارەوانیان ڤە داتا و زانیاریێن هویر و ئاستەنگێن وان دەربارەی وێ پرۆسەیێ هاتنە پێشکێشکرن کو هژمارەک ژ شارەوانیان بەشێ زۆر ژ کارێن خۆ تەمام کرینە د دابینکرنا ئەردی و دانانا نەخشەیا کەرتی و هژمارا فەرمانبەران و د پێشڤەبرنا پرۆسەیێ دا بەردەوامن.
وەزیرێ شارەوانی و گەشتوگوزار، "بەحسێ گرنگیا پرۆسەیا دابەشکرنا ئەردی ل سەر فەرمانبەران کر و تەئکید ل سەر لەزکرنا ئامادەکاریێن شارەوانیان کر و راسپارد ئەوێن هەتا نوکە ئامادەکاریێن خۆ تەمام نەکرینە یان ئاستەنگ هەنە، ب زویترین دەم ئاستەنگێن خۆ چارەسەر بکەن، تەئکید کر پێدڤیە هەمی رێکارێن یاسایی و کارگێری ب زویترین دەم تەمام بکەن و نەخشەیا کەرتی بۆ ئەردیان دابنێن، دا کو فەرمانبەر ژ وی بریارێ حکومەتا هەرێما کوردستانێ سوودمەند ببن ب وەرگرتنا ئەردی".
ل گۆر وان زانیاری و داتایێن د جڤینێ دا ژ لایێ شارەوانیان ڤە هاتینە پێشکێشکرن، پێشڤەچوونا پرۆسەیێ د ئاستەکێ گەلەک باش دایە و وەزیرێ شارەوانی و گەشتوگوزاریێ ژی ئاماژە ب وێ یەکێ کر کو ل 10ێ ئوکتۆبەرێ ئەڤ سالێ جڤینەکا دی دێ هێتە کرن و پێدڤیە هەتا وی دەمی هەمی ئامادەکاری تەمام ببن و پێشڤەچوونا زێدەتر روی بدەت.