کوردستان

کۆمیسیۆن بۆ بەربژێران: ژ گۆتارا رق و کینێ و سڤکاتیێ دویر بکەڤن و پابەندی رێسایان بن

کوردستان دهوك دیجیتال میدیا

کۆمیسیۆن داخوازێ ژ بەربژێر و لایەنێن هەرێما کوردستانێ دکەت کو ژ گۆتارا رق و کینێ و توندوتیژیێ دویر بکەڤن و داخوازا پشتەڤانیێ ژی دکەت ژ بۆ بەڕێڤەبرنا هەلبژارتنەکا ئازاد و دادپەروەرانە.

ئەڤرۆ (چارشەمب، 9-10-2024) سەرۆکێ ئەنجوومەنێ کۆمیسیاران ل کۆمیسیۆنا باڵا یا سەربەخۆ یا هەلبژارتنێن عیراقێ، راگەهاندنەک بەلاڤکر و ئاماژە ب وێ یەکێ دکەت کو کاریایە ب سەرکەفتی خشتەیێ دەمی یێ هەلبژارتنا پەرلەمانێ کوردستانێ تەمام بکەت. داخواز ژی ژ لایەنێن سیاسی، هەڤپەیمانی و بەربژێران دکەت کو بەشدارن د هەلبژارتنێ دا "پابەند بن ب پەیڕەو و سیستەمێ هەلبژارتنێ کو ژ بۆ رێکخستنا بانگەشێ هاتیە دەرکرن".

دەربارەی بانگەشێ، کۆمیسیۆنێ کۆمەکا خالان دیار کرینە و داخواز دکەت، بەشداربوویێن هەلبژارتنێ د هەلمەتێن خوە دا ژێ دویر بکەڤن، ژ وان "دویرکەفتن ژ گۆتارا هاندەرا توندوتیژیێ، رق و کینێ، سڤکاتیکرن و زیانگەهاندن ب بەربژێرێن دی و رکەبەرێن خوە هەتا رۆژا دەنگدانێ و راگەهاندنا ئەنجامان".

کۆمیسیۆن داخواز ژی دکەت، ئەگەر تێبینی و رەخنەیەک هەبن "بەربژێر و لایەن و هەڤپەیمانی پەنا بەرنە بەر رێکێن یاسایی د تۆمارکرنا سکالا و تانەدانێ دا، نە کو ئەو رێکێن کو کار و کاردانەوە دروست دکەن د ناڤبەرا رکەبەران دا".

کۆمیسیۆن دلنیایی ددەت کو "نێرینا ل سکالایان ب وێ پەڕی سەربەخۆیی دێ بیت".

د وێ راگەهاندنێ دا، کۆمیسیۆن داخواز ژ دەنگدەران، هەڤپەیمانیان، لایەنێن سیاسی، بەربژێران، چاڤدێران، میدیاکاران و هەمی ئەوێن پەیوەندیدار ب کاروبارێ هەلبژارتنێ ڤە دکەت "پشتەڤانیا کارتێن کۆمیسیۆنێ بکەن و بەشداری د هەولێن وێ دا بکەن، ژ بۆ رێکخستن و ئەنجامدانا هەلبژارتنەکا ئازاد و دادپەروەرانە، کو جهێ متمانەیا هەمیان بیت".

کۆمیسیۆن هیڤیدار ژی یە "ئەنجامێن ڤێ هەلبژارتنێ گاڤەکا زێدەکەر بیت بەرەڤ پێشەرۆژەکا ئارام و خوەشگوزەران ژ بۆ گەلێ مە ل هەرێما کوردستانێ".

بانگەشا هەلبژارتنا پەرلەمانێ کوردستانێ رۆژا 25-9-2024 دەستپێکریە و 15-10-2024 دێ کۆتایی هێت. بڕیار ژی یە دەنگدانا تایبەت ژ بۆ هەلبژارتنا پەرلەمانێ کوردستانێ رۆژا 18-10 و دەنگدانا گشتی ژی 20-10-2024 بیت.