جیهان

وەزیری پەتڕۆلا ئیرانێ: هنارتنا پەتڕۆلا مە زێدەترە ژ پارسالێ

کوردستان دهوك دیجیتال میدیا

وەزیری پەتڕۆلا ئیرانێ راگەهاند کو بەرهەمئینانا پەتڕۆلا وان نێزیکی 140 هزار بەرمیلان د رۆژەکێ دا زێدە کریە. گۆت ژی، ب بەراورد دگەل پارسالێ، پەتڕۆلەکا زێدەتر هنارتنێ دکەن.

ئەڤرۆ رۆژا چارشەمبی، 29-10-2025، موحسن پاکنەژاد، وەزیری پەتڕۆلا ئیرانێ دەربارەی هنارتنا پەتڕۆلێ ب میدیایێن وەلاتی راگەهاند، "ب داخڤە، نەشێم ژماران بێژم، ئەگەر نە، وە دزانی کو نوکە رەوشا هنارتنا پەتڕۆلێ گەلەک باشترە ژ جاران."

موحسن پاکنەژاد گۆت: "ب دلخۆشی ڤە نوکە ب بەراورد دگەل هەمان دەمێ پارسالێ، بەرهەمئینانا پەتڕۆلا مە د ناڤبەرا 140 هزار بۆ 142 هزار بەرمیلان دا د رۆژەکێ دا زێدەبوویە."

ب گۆتنا وەزیری پەتڕۆلا ئیرانێ، پشکەک ژ وێ بڕا زێدە هنارتنێ دکەن و پشکەک ژی ددەنە پالاوگەهان، "بۆ وێ چەندێ بشێین گازوایل و بەنزینێ زێدەتر بەرهەم بینین و بڕا هاوردەکرنا ڤان هەردوو بەرهەمێن پەتڕۆلی کێمتر لێ بهێت."

ئاخفتنێن موحسن پاکنەژاد د دەمەکی دان کو 28ـێ ئیلۆنا ڤی سالی، ئەلمانیا، بریتانیا و فەرەنسا میکانیزما سناپباکی چالاک کر و هەمی سزایێن نەتەوەیێن ئێکگرتی یێن گرێدای ب پڕۆژێ ئەتۆمی یێ ئیرانێ ڤە، ڤەگەراندنە سەر وەلاتی و ئێک ژ ئارمانجێن وان رێگریکرنە ل هنارتنا پەتڕۆلێ ژی.

ب سەدەما سزایێن نێڤدەولەتی، ئیران زانیاریێن دروست ل سەر بڕا بەرهەمئینان یان هنارتنا پەتڕۆل و گازی بەلاڤ ناکەت، لێ ب گۆرەی راپۆرتێن پشکەک ژ رێکخراوێن چاڤدێر، رۆژانە 1.5 ملیۆن بۆ 1.7 ملیۆن بەرمیل پەتڕۆل هناردەی چینێ دکەت، کو سەرەکیترین کریارێ پەتڕۆلا تارانێ یە.