جیهان
ئەمریکا بۆ کۆچبەرێن نەیاسایی: بزڤڕن دێ 30 گەڵا دەینە هەوە، ئەگەر نە دێ هێنە دەستەسەرکرن
2026-01-13 , 18:07
کوردستان دهوك دیجیتال میدیا
وەزارەتا ئاسایشا نیشتمانی یا ئەمریکا بڕیار دا خەلاتێ وان کۆچبەرێن ب حەزا خۆ وەلاتی بجهـ دهێلن ژ 1000 دۆلاران بۆ 3000 دۆلاران زێدە بکەت. وەزیرێ ئاسایشا نیشتمانی ژی دبێژیت: "ئەوێ نەچیت دێ هێتە دەستەسەرکرن و چو جاران نەشێت بزڤڕیتە ڤە."
وەزارەتا ئاسایشا نیشتمانی یا ئەمریکا راگەهاند، هەر کۆچبەرەکێ بێ بەلگەنامە کو هەتا 31ی کانوونا ئێکێ یا 2025ێ ب حەزا خۆ وەلاتی بجهـ بهێلیت، دێ بڕێ 3000 دۆلاران دەنێ؛ زێدەباری ڤێ چەندێ ژی، بلیتێ فرۆکێ دێ بۆ هێتە دابینکرن و ژ هندەک سزایێن گرێدای مانا نەیاسایی دێ هێتە بەخشین.
بۆ وەرگرتنا ڤی خەلاتی، دڤێت کۆچبەر ب رێکا ئەپلیکەیشنا (CBP Home) ناڤێ خۆ تۆمار بکەن. ئەڤ ئەپلیکەیشنە بەری نوکە ب ناڤێ (CBP One) بۆ دیارکرنا دەمێ چاڤپێکەفتنا پەنابەران دهاتە بکارئینان، بەلێ ئیدارا ترەمپی گوهۆرییە بۆ ئامرازەکێ ڤەگەراندنا خۆبەخشانە.
مەرجێ وەرگرتنا پارەی ئەوە کو دەمێ حکومەتا ئەمریکا پشتراست کر کو وی کەسی وەلاتی بجهـ هێلایە، وی دەمی دێ پاداشت دەتێ.
کریستی نۆم، وەزیرا ئاسایشا نیشتمانی یا ئەمریکا هۆشداری دا و گۆت: "ئەو کەسێن مفاین ژ ڤێ دەلیڤێ وەرنەگرن، دێ هێنە دیتن، دێ هێنە دەستەسەرکرن و دیپۆرتکرن و چو جاران رێکا ڤەگەرانێ بۆ ئەمریکا بۆ وان ناهێتە دان."
بەرپرسێن ئەمریکا ئەگەرێ ڤێ بڕیارێ بۆ کێمکرنا مەزاختیێن سەر باجدەران ڤەدگەرینن؛ ل دویڤ خەملاندنێن فەرمانگەها کۆچ و گومرگ (ICE)، تێچوونا دەستەسەرکرن و دەرکرنا کۆچبەرەکی نێزیکی 17 هزار دۆلارانە، لەورا دانا 3000 دۆلاران تێچوونەکا کێمترە بۆ حکومەتێ.
ل مەها تشرینا ئێکێ، حکومەتا ئەمریکا پلانەک راگەهاند بۆ دانا خەلاتێ دوو هزار و 500 دۆلاران بۆ وان مێردمنداڵێن کۆچبەرێن دڤێن ب حەزا خۆ بزڤڕنە وەلاتێن خۆ.
ل دویڤ ئامارێن وەزارەتا ئاسایشا نیشتمانی، ژ کانوونا دویێ یا 2025ێ و هەتا نوکە، ملیۆنەک و 900 هزار کۆچبەرێن بێ بەلگەنامە "ب حەزا خۆ" وەلاتی بجهـ هێلایە.