کوردستان
6 هزار دەریاڤان ماینە ئاسێ ل گەروویا هورمز
2026-08-28 , 18:22
ئەمینداری گشتی یێ رێکخراوا نێڤدەولەتی یا دەریاوانی بۆ تۆڕا (CBS) یا ئەمریکی ئاشکرا کر، کو نزیکی 6 هەزار دەریاوان د ناڤ 400 کەشتییان دا ل گەروویێ هورمز گۆڕوکاڤی بووینە و ژبەر هەلبوونا جەنگێ ئەمریکا و ئێرانێ پرۆسەیا ڕزگارکرنا وان هاتییە ڕاگرتن و هەتا نوکە ژی نزیکی 19 دەریاوان د دەمێ ئەورکێن خۆ دا گیانێ خۆ ژ دەست دایە.
پەنجشەممە، 28ـی ئابا 2026، تۆڕا هەواڵی (CBS) یا ئەمریکی ژ زارێ ئارسینیۆ دۆمینگێز، ئەمینداری گشتی یێ رێکخراوا نێڤدەولەتی یا دەریاوانی بەلاڤکر، کو نزیکی 6 هەزار دەریاوان د ناڤ 400 کەشتییان دا ل گەروویێ هورمز گۆڕوکاڤی بووینە و ناتڤێن ناوچەی بهێلن.
هەروەسا ئاماژە ب وێ چەندێ ژی دا، کو هەزاران دەریاوان ل ناوچەیا گەروویێ هورمز د ژێر بارودۆخەکێ پڕ مەترسی و نادڵنیایی یا ئەمنی یا توند دا دژین و کار دکەن. دۆمینگێز ب بۆنا تێپەڕبوونا شەش مەهان ب سەر جەنگێ ڤە، باسی ل وێ چەندێ کر، کو ئەڤ ململانێیە بوویە سەدەمێ پەککەفتنەکا مەزن د زنجیرا دابینکەرێن سووتەمەنی و کالایێن بنەڕەتی ل سەر ئاستێ جیهانی.
ل گۆرەی زانیارییێن رێکخراوەی، سەرەڕای ڕاگەهاندنا پلانەکە بەرفراوان بۆ دەربازکرنا کارمەندێن کەشتییان ل ناوچەیا کەنداوی، تنێ 136 کەشتی و نزیکی 2 هەزار و 900 دەریاوان هاتینە ڕزگارکرن؛ لێ پرۆسەیا ڕزگارکرنێ ژ دووماهییا مەها حوزەیرانێ و ژبەر دەستپێکرناڤەیا هێرشێن سەربازی د ناڤبەرا ئەمریکا و ئێرانێ دا ب تەواوی هاتییە ڕاگرتن.
هەرواتە هاتییە ئاشکراکرن کو ژ 28ـی شوباتێ و ژ دەستپێکا جەنگی هەتا نوکە، کێمترین 19 دەریاوان د دەمێ ئەورکێن خۆ دا ل ناوچەی گیانێ خۆ ژ دەست دایە.
ئەمینداری گشتی یێ رێکخراوا دەریاوانی نیگەرانیا خۆ یا کوور ژ تێکچوونا بەردەوام یا ئاسایشا دەریایی ل جیهانی دەربڕی، ژ دەریا ڕەش هەتا دەریا سوور، کەنداوی عەدەن و گەروویێ هورمز، و جەخت ل سەر کر، کو ئەڤ ناسەقامگیرییە زیانەکا مەزن گەهاندییە بازرگانییا نێڤدەولەتی و مەترسییەکە ڕاستەوخۆیە بۆ سەر ژیانا هەزاران دەریاوانێن بێتاوان.