کوردستان
مەرجێن نوێ بۆ وەرگرتنا بەنزینا 750 دیناری ل هەولێر هاتە دانان
2026-09-07 , 11:37
بۆ رێگری کرن ژ پێشێلکاریان و مامەڵەکرنا ب كارتێن سووتەمەنیێ، ژ هەفتەیا داهاتی شێوازێ پێدانا بەنزینا 750 دیناری مەرجێن نوێ ب خۆڤە دبینیت.
سالح مەهدی، خودانێ بەنزینخانەکێ ل باژێرێ هەولێرێ، بۆ دەزگەهێن ڕاگەهاندنێ دیار کر، ژلایێ بڕێوەبەرییا نەوت و کانزایێن هەولێرێ ڤە ئاگادارکرنەک بۆ بەنزینخانەیان هاتییە نراندن کو مەرجێن نوێ بۆ دابەشکرنا بەنزینا 750 دیناری هاتینە دانان.
ل گۆڕەی مەرجێن نوێ، دڤێت هەر شوفێرەکێ كارتا سووتەمەنیێ هەی، د دەمێ وەرگرتنا بەنزینێ دا كارتا نیشتمانی یان ناسنامەیەكا فەرمی دگەل خۆ هەبیت، داكو بیسەلمینیت کو ئەو كارتە یا وى خۆیە و موڵكێ وی یە. ئەڤ هەنگاڤە ژ بۆ رێگریكرنێ ل فرۆتن و مامەڵەپێکرنا ب كارتێن سووتەمەنیێ یە كو د ڤان دووماهیان دا بەلاڤ بوویە.
ئەڤ بڕیارە دێ ل هەفتەیا داهاتی کەفتە بیاڤێ جێبەجێکرنێ ڤە، و خودانێ بەنزینخانێ ئاماژە ب وێ چەندێ ژی کر کو نوکە نۆرەیا دابەشکرنا بەنزینێ گەلەک کێم بوویە و شوفێر د ماوەیەکێ کێمتر ژ سەعاتەکێ دا بەنزینێ وەردەگرن.
ژ بۆ زانین، ماوەی مەهەکە دابەشکرنا بەنزینێ ل هەرێما کوردستانێ ب ڕێکا كارتا سووتەمەنیێ هاتییە ڕێکخستن، ب ڤی ئاوایی ژی شوفێر ب شێوەیەکێ دادپەروەرانە پشکا خۆ یا بەنزینێ وەردەگرن.